EMDR þjálfun

Fagaðilar sem hafa áhuga á að læra EMDR meðferð geta nýtt sér upplýsingar hér að neðan.   Undanfarin ár hefur verið u.þ.b. eitt Weekend 1 námskeið á ári. Áhugasamir geta haft samband við Gyðu Eyjólfsdóttur sálfræðing í gegnum netfangið gyda@emdrstofan.is

Athugið að lágmarkskröfur eru gerðar til þeirra sem mega sækja námskeið í EMDR meðferð. Kröfurnar eru settar fram af félaginu EMDR Ísland.

  • Þátttakendur þurfa að hafa að lágmarki klíníska mastergráðu eða ígildi hennar á geðheilbrigðissviði.
  • Þátttakendur þurfa að vera löggiltir heilbrigðisstarfsmenn sem heyra undir Landlækni og í fagfélagi sem hefur skilgreindar siðareglur.
  • Háskólanám þeirra þarf að hafa innihaldið námskeið í geðgreiningum.
  • Þá er krafist að lágmarki eins árs starfsreynslu við sálræna meðferð að námi loknu auk að lágmarki 20 handleiðslutíma. Þar af þurfa að minnsta kosti 10 að vera einstaklingshandleiðsla.
  • Umsækjendur þurfa að senda inn gögn sem staðfesta ofangreint með umsókn sinni.
  • Vafamál eru lögð fyrir fund stjórnar EMDR á Íslandi og kostar 10.000 kr að fá umsókn tekna fyrir.  Senda má vafamál á netfangið emdrislandi@gmail.com

Um þjálfunina:  Þjálfun fer fram hjá EMDR leiðbeinendum sem eru hæfnivottaðir af EMDR Europe. Þjálfunin er margþætt og fer fram með fyrirlestrum, verklegum æfingum og handleiðslu.  Segja má að lágmarks tími til að fá fulla viðurkenningu sem EMDR meðferðaraðili sé tvö ár. Evrópusamtökin bjóða þjálfun í þremur hlutum og er þess krafist að meðferðin sé notuð og æfð milli námskeiða.

Eftir að grunnþjálfun er lokið (Weekend 1, 5 tímar í handleiðslu, Weekend 2, 5 tímar í handleiðslu) er hægt að læra meira og sækja Advanced námskeið.  Þau eru haldin víðsvegar um heiminn og kenna ýmislegt til að dýpka sig í EMDR meðferð, svo sem um hvernig skal nota EMDR í tengslum við flókin áföll (Complex Trauma), vinnu með hugrof (Dissociation), o.fl.  Til að geta sótt slík námskeið þarf að sýna fram á að grunnþjálfun sé lokið.

Handleiðslukrafa: Eftir Weekend 1 námskeið er gerð krafa um 5 tíma handleiðslu hjá viðurkenndum EMDR kennara eða aðstoðarkennara og einnig er þarf 5 tíma handleiðslu eftir Weekend 2 námskeið.  Hægt er að sækja slíka handleiðslu á Íslandi hjá Gyðu Eyjólfsdóttur sálfræðingi og/eða Margréti Blöndal hjúkrunarfræðingi. Þær eru báðar með réttindi sem aðstoðarkennarar (facilitator).

Þeir sem vilja tileinka sér EMDR fræðin og fá viðurkenningu sem EMDR meðferðaraðili (EMDRIA Certified Therapist in EMDR og/eða EMDR Europe Accreditated Therapist) þurfa auk námskeiða að ljúka handleiðslu hjá viðurkenndum EMDR handleiðara. Brynhildur Scheving Thorsteinsson og Gyða Eyjólfsdóttir sálfræðingar, auk Margrétar Blöndal hjúkrunarfræðings eru viðurkenndir EMDR handleiðarar á Íslandi. Elín Jónasdóttir og Sigríður Karen Bárudóttir sálfræðingar eru að vinna að handleiðararéttindum. Eins er hægt að sækja handleiðslu erlendis frá gegnum síma eða Skype.

EMDR Ísland félagið tilheyrir EMDR Europe og þarf því að uppfylla reglur sem Evrópufélagið setur.

Hér má lesa kröfur EMDR Europe varðandi EMDR Certification: http://www.emdr-europe.org/info.asp?CategoryID=83

Handleiðsluhópar eru haldnir öðru hvoru, auk þess sem hægt er að sækja einstaklingshandleiðslu hjá ofangreindum aðilum.

EMDR ráðstefnur eru haldnar árlega hér og þar í heiminum.  EMDRIA ráðstefnan er haldin í Bandaríkjunum í ágúst á hverju ári, EMDR Canada í Kanada, EMDR Europe ráðstefnan er haldin í mismunandi Evrópulöndum í júní árlega.  Fleiri ráðstefnur eru til.